Dorotea. No lo vôi praticar.
No vôi che so muggier s’abbia da lamentar.
Ma cosa t’alo dito?
Zanetta. El m’ha dito cussì,
Che el tornerà da ela avanti mezzodì.
Dorotea. Che noi staga a vegnir; no lo vôi praticar.
Zanetta. Se sa cossa che el voggia?
Dorotea. La se lo poi pensar.
Zanetta. El la vede al balcon, do volte el gh’ha parlà.
Gramazzo! se el podesse, el vorria vegnir qua.
No la lo vol?
Dorotea. Bisogna, quando la xe cussì,
Che ghe daga in tel genio.
Zanetta. L’ho pensada anca mi.
Dorotea. E sì, per quel che so, l’è un omo che ha cervello.
Zanetta. (Me par che saria tempo de parlar dell’anello). (da sè)
Dorotea. De mi coss’alo dito?
Zanetta. L’ha dito tanto ben;
L’ha parlà veramente, come che se convien.
Se vede che per ella el gh’ha tutto el respetto.
Lustrissima, la varda mo sto bell’aneletto.
Dorotea. Un anello? Pettegola, cossa voressi dir?
De mandarmelo fursi alo avudo l’ardir?
Regali a una par mia? vorave véder questa!
Senti, desgraziadela, te romperò la testa.
Zanetta. Pian pian, no la se scalda, che la m’ha tiolto in falo.
Sto anello el xe da vender. Nol xe miga un regalo,
Xe vegnù stamattina da mi donna Verigola,
Quella vecchia sì fatta, che fa la revendigola;
La gh’haveva sto anello, e la me l’ha lassà
Acciò che ghe lo mostra: i lo dà a bon marcà.
El val diese zecchini, dise chi se n’intende;
E adesso per bisogno a bon marcà i lo vende.
Per cinque o sie zecchini...
Dorotea. Lo compreria per tre.
