 |
Questa pagina è stata trascritta, formattata e riletta. | |
| 128 | ATTO PRIMO |
Zanetta. Oibò. La xe con quel putello...
Gnese. Con Momolo forner?
Zanetta. Sì ben, giusto con quello.
Gnese. Ca de diana! una vecchia da metter in aseo1
La sta con quel putello che no xe longo un deo?
Cossa diseu? sta vecchia la fa la fantolina...
SCENA IV.
Momolo e dette.
Zanetta. Bravo, vegnì con mi.
Gnese. Zanetta, dove andeu?
Zanetta. Vago a far un servizio.
Gnese. Sto secchio me lo deu?
Zanetta. No ghe n’ho, cara vecchiaì2. Presto, andemo de suso.
(entra con Momolo, e chiude la porta)
Gnese. Frasconazza! la porta la me serra in tel muso?
Chi credistu che sia? se no ti sa chi son.
Te lo farò saver, ghe lo dirò al paron:
El paron che me tien come una so sorella,
Che in casa el m’ha arlevà, se pol dir da putella,
Che mai nol me rimprovera, che mai nol me strapazza.
Vôi che el sappia l’affronto che ho abuo da sta pettazza.
Oh, vien sior Anzoletto. L’è un putto che me piase;
Ma che el me trova qua col secchio, me despiase.
SCENA V.
Anzoletto e Gnese.
Gnese. Son qua, no me vede?
Anzoletto. Comande, cara fia.
