 |
Questa pagina è stata trascritta, formattata e riletta. | |
| 80 | ATTO SECONDO |
Pantalone. Gola de porco, va via de qua.
Traccagnino. Pazenzia! «
Pantalone. Chi xe che me domanda?
Traccagnino. El sior don Luigi, quello che gh’ha manda...
Pantalone. No lo posso recever. Dighe che no posso, che el me perdona... no lo posso recever.
Traccagnino. Ghe lo dirò. Sior patron...
Pantalone. Cossa vustu?
Traccagnino. Almanco una nasadina, per carità.
Pantalone. Presto, va da don Luigi, che nol vegnisse avanti. El sarave capace de farlo. Dighe che sarò da elo.
Traccagnino. Sior sì. (Ghe ne vôi magnar, se ghe fusse la forca). (da sè, parte)
SCENA XII.
Pantalone, poi Traccagnino che torna.
Pantalone. Caspita, el xe lesto sior1ganimede! Sta civiltà no la me piase. E pur sarave ben che sentisse un poco cossa che el sa dir, e che scovrisse terren.
Traccagnino. El dis cussì el sior don Luigi, che vussoria s’accomoda, se l’ha da far; che intanto l’anderà a dar el bon zorno alla patrona.
Pantalone. No, no, dighe che nol s’incomoda. Più tosto, che el vegna da mi, se el vol... Aspetta, debotto ho finio. Anca questa xe fatta. Presto, falo vegnir. (ripone la cioccolata)
SCENA XIII.
Pantalone, poi don Luigi.
Pantalone. Cossa diavolo vorralo da mi don Luigi? Oh bella! el voleva andar da mia muggier. Sì ben, la cioccolata, el bacil d’arzento no la giera roba destinada per mi. So arrivà a tempo.
- ↑ Guibert, Zatta ecc.: sto sior.
