 |
Questa pagina è stata trascritta, formattata e riletta. | |
| 494 | ATTO TERZO |
Brighella. Ala letto?
Pantalone. Ho letto. (serra la lanierrta)
Brighella. Cossa diseia? Lo porla consolar?
Pantalone. Sentì, missier Brighella, mi son uno che per gonzo non vol passar. Fazzo servizio, co posso, basta che no i me vegna con dei partii. Se sior Ottavio voi andar a Livorno, se el gh’ha bisogno dasseno per i fatti soi, e no per zogar, son un galantomo, lo servirò. L’anello l’ho fatto veder, l’ho fatto stimar. Tutti lo considera de sotto dei cento e cinquanta zecchini. Ma a chi stima, no ghe dol la testa. Andò là, andò dal vostro paron, diseghe che, se l’è contento, ghe ne darò cento e settanta. Comprerò mi l’anello per farghe servizio, e perchè nol creda che voggia far negozio sul so bisogno, diseghe che el vaga a Livorno, che el fazza i fatti soi: tegnirò l’anello sie mesi, un anno, e senza nissun interesse; e col me darà i mi bezzi, ghe darò la so zoggia indrio.
Brighella. Questo l’è un trattar da gran signor, da par soo.
Pantalone. No son un gran signor, ma son un galantomo. Son chi son.
Brighella. Caro sior Pantalon....
Pantalone. Andò via, no perde più tempo. Adessadesso sarò là anca mi.
Brighella. Vado subito. Ma no ghe vedo.
Pantalone. Aspettò, che ve farò luse. (apre la lanterna)
Brighella. No vorave....
Pantalone. Andè via de qua, ve digo.
Brighella. (Anderò da st’altra banda.) (da sè, e parte)
Pantalone. Ho paura che i passa la mezza dozzena. (fischia)
SCENA XI.
Martino e Pantalone.
Martino. Furbazzi! Sassini! Mi no fazzo gnente a nissun.
Pantalone. Com’èia? (apre la lanterna)
Martino. Sior Pantalon, son sassinà.
