 |
Questa pagina è stata trascritta, formattata e riletta. | |
| 492 | ATTO TERZO |
SCENA IX.
NOTTE.
Strada.
Pantalone con lanterna, e due Uomini.
Pantalone. Lo cognosseu sior Martin?
Uomo. Lo cognosso.
Pantalone. De qua l’averia da passar.
Uomo. A sta ora el passa ogni sera.
Pantalone. Ben, retireve. Stè attenti; e col capita, deghe sie bastonadele per omo, e gnente più.
Uomo. Lassè far a mi, sior.
Pantalone. No ghe dè sulla testa. No ghe fe troppo mal. Me basta che l’impara a parlar ben dei galantomeni della mia sorte. Vu altri stè là; mi stago qua; e se ghe sarà bisogno de gnente, fideve de mi. Savè chi son. No ve lasserò in te le pettole1. (chiude la lanterna)
Uomo. Me despiase de no poderghe dar sulla testa. (parte)
Pantalone. De costori me posso fidar. Per mi i anderave in tel fogo, perchè po anca mi, in ti so bisogni, ghe fazzo del ben se occorre, so defenderli in t’una occasion; e per i mi amici, e per i mi dependenti, ghe son colle man, colla ose, colla scarsella e colla vita stessa se occorre.
SCENA X.
Brighella con lanterna accesa, e Pantalone.
Brighella. Oh Sior Pantalon, èla ella?
Pantalone. Stuè quel feral.
Brighella. Gh’ho da parlar, gh’ho da dar una polizza.
Pantalone. Stuè quel feral, ve digo.
Brighella. Ma no se ghe vede...
- ↑ Nelle angustie, nell’imbarazzo: v. Boerio.
