 |
Questa pagina è stata trascritta, formattata e riletta. | |
| 46 | ATTO PRIMO |
SCENA VII.
Traccagnino e detto.
Traccagnino. Sior padron, son qua.
Pantalone. Cossa gh’è? Cossa vustu? Perchè vienstu senza dir gnente? (nasconde l'oro)
Traccagnino. Oh, gh’è delle novità, signor.
Pantalone. Cossa fa mia muggier?
Traccagnino. Cossa che la fazza mi nol so.
Pantalone. No ti l’ha vista?
Traccagnino. Signor no.
Pantalone. Perchè no l’astu vista?
Traccagnino. Perchè l’era serrada in camera.
Pantalone. Sola?
Traccagnino. Oh, signor no, sola.
Pantalone. Colla serva?
Traccagnino. Colla serva e con el servo.
Pantalone. Come? Un omo in camera de mia muggier?
Traccagnino. Alla voze el m’ha parso un omo sigura.
Pantalone. Ah desgraziada! presto: l’astu cognossù alla ose?
Traccagnino. Sior no, perchè i parlava pian.
Pantalone. Furbazzi! el mio onor; el mio pan: mi spendo, e i altri gode. (va ponendo i denari in borsa) Allocco, no ti ha inteso gnente, gnente?
Traccagnino. Non ho sentido altro che una parola sola.
Pantalone. Coss’èia sta parola?
Traccagnino. Ho sentido la padrona a dir: vogliatemi bene.
Pantalone. Vogliatemi bene? La mazzerò... Ma la Giustizia? La ripudierò: ah, ste lite le costa troppo! La bastonerò, la farò star in letto. Presto, la voggio trovar sul fatto. Ma no vorave entrar in qualche brutto impegno. No so chi diavolo possa esser colù. Traccagnin, presto, torna alla camera de mia muggier, procura de sentir; varda, sentime ben, varda una quarta in circa de sotto alla serraura, ti troverà un buso, e per de là ti vederà pulito.
