 |
Questa pagina è stata trascritta, formattata e riletta. | |
| IL VECCHIO BIZZARRO | 447 |
Martino. Ve torno a dir, che col vostro patron me manderà i mi quaranta ducati, ghe darò el so anello.
Pantalone. Un anello de sior Ottavio?
Brighella. Sior sì, el me l’ha cavà dalle man.
Pantalone. E vu gh’averè tanto ardir de tegnir un anello in pegno, quando un omo della mia sorte v’ha dito che sarè pagà?
Martino. Mi no so gnente. Co gh’averò i mi bezzi, darò l’anello.
Pantalone. Sior Ottavio xe un galantomo.
Martino. I mi quaranta ducati.
Pantalone. Mi son un omo d’onor.
Martino. Quaranta ducati.
Pantalone. Vintiquattro ore no xe passae.
Martino. In vintiquattro ore se va a Ferrara.
Pantalone. Quel signor no xe capace de una mala azion.
Martino. I mi quaranta ducati.
Pantalone. I vostri quaranta ducati i xe qua parecchiai. (tira fuori una borsa)
Brighella. Fora l’anello, patron. (a Martino)
Martino. Conteme i mi quaranta ducati.
Pantalone. Tegnì saldo. Quaranta ducati d’arzento i fa tresento e vinti lire de sta moneda. Quattordese zecchini fa tresento e otto. Con dodese lire arente vu sè pagà. (contando)
Martino. Va ben; deme i bezzi.
Pantalone. Fora l’anello.
Martino. Tolè, sior. (lo dà a Pantalone)
Pantalone. Questi xe i vostri bezzi.
Martino. I zecchini xeli de peso?
Pantalone. Vardè se i xe de peso per la marcanzia che gh’ave vendù.
Martino. Ho rischià el mio sangue.
Pantalone. Sè un farabutto.
Martino. No ve bado, perchè sè vecchio. (parte)
