 |
Questa pagina è stata trascritta, formattata e riletta. | |
| 446 | ATTO PRIMO |
Brighella. Donca...
Martino. Donca diseghe al vostro paron, che col me darà i mi quaranta ducati d’arzente, ghe darò el so anello. (lo mette via)
Brighella. Come! l’anello ve l’ho fidà mi in tele man.
Martino. No xelo del vostro patron?
Brighella. El xe del mio patron; ma per questo...
Martino. Se el lo vol, che el me manda quaranta ducati.
Brighella. Questa no xe la maniera de trattar.
Martino. Amigo, no femo chiaccole.
Brighella. Voleu che ve la diga, sior Martin?
Martino. Cossa me vorressi dir?
Brighella. La xe una baronada.
Martino. Bisognerave che ve respondesse.
Brighella. Rispondeme, se ve basta l’anemo.
Martino. Ve respondo cussì. (gli dà uno schiaffo)
Brighella. Corpo del diavolo! a mi un schiaffo?
Martino. Quella xe la mostra; se tirerò de longo, metterò man al baril.
Brighella. Le man le gh’ho anca mi.
Martino. Se avere ardir gnanca de parlar, quel muso ve lo taggierò in quattro tocchi.
Brighella. Averè da far col patron.
Martino. No gh’ho paura nè de lu, nè de vu, ne de diese della vostra sorte.
Brighella. Prepotenze, baronade, insolenze.
Martino. Via, sier buffon. (mette mano allo stile)
SCENA XIV.
Pantalone e detti.
Pantalone. Com’èla, sier buletto dal stilo? Seu nato per far paura? Doveressi andar in ti campi a spaventar le passere.
Martino. Ve porto respetto, perchè sè vecchio.
Brighella. El mio anello, la mia roba. No se tratta cussì.
Pantalone. Com’èla, compare Martin?
