 |
Questa pagina è stata trascritta, formattata e riletta. | |
| 278 | ATTO SECONDO |
Argentina. Ben donca, se ve volè mandar, putti cari, imparè come che se fa co se xe maridai. Oe, marìo, dove seu?
Traccagnino. ( Vestito da villano) Son qua, fia mia.
Argentina. Mario, stassera vegnì a casa a bonora.
Traccagnino. Sì ben, volentiera.
Argentina. Se divertiremo vu e mi.
Traccagnino. Zogheremo all’oca.
Argentina. Doman anderemo insieme al mercà.
Traccagnino. Sempre insieme. Marìo e muggier sempre insieme.
Argentina. Compreremo una carpetta1 per mi, e da far una velada per vu.
Traccagnino. E coi bezzi alla man, la gh’averemo più a bon mercà.
Argentina. I bezzi no li spendemo tutti. Tegnimose el nostro bisogno.
Traccagnino. Disè ben. Faremo pochetto, ma faremo coi nostri bezzi.
Argentina. No voggio debiti.
Traccagnino. Che nissun ne vegna a batter alla nostra porta.
Argentina. Alla nostra tola nissun ha da vegnime a magnar le coste.
Traccagnino. Gnanca mi no anderò a scroccar da nissun.
Argentina. Se vorremo ben.
Traccagnino. Goderemo la nostra pase.
Argentina. Mi laorerò.
Traccagnino. E mi ve farò compagnia.
Argentina. E nissun mormorerà.
Traccagnino. E nissun dirà mal de nu.
Argentina. Vago in cusina a parecchiar da disnar.
Traccagnino. E mi magnerò colla mia Momoletta.
Argentina. Vago, marìo. Voggième ben.
Traccagnino. Sì, cara, ve ne vorrò.
Argentina. Oe. (chiama)
- ↑ Gonnella.
