![]() |
Questa pagina è stata trascritta, formattata e riletta. | ![]() |
LA FIGLIA OBBEDIENTE | 461 |
Arlecchino. Son mi, paesan. Ben vegnudo. Ho savù che ti è vegnù a Venezia; te son vegnudo a trovar.
Brighella. Sì, te vedo volentiera. Ma a mi sto tu el se poderia sparagnar.
Arlecchino. No semio amici? No semio camerade?
Brighella. Altri tempi, altre cure. Ti, poverazzo, ti è ancora un povero servitor; mi son qualcossa de più.
Arlecchino. Coss’et, caro ti?
Brighella. No ti vedi in che figura che son?
Arlecchino. Vedo; me ne consolo: ma caro ti...
Brighella. A monte sto ti. Parla con un poco più de respetto.
Arlecchino. Caro signor Brighella, la compatissa.
Brighella. Cosa fate? State bene?
Arlecchino. Mi stago ben, e ti?...
Brighella. Son stufo de sto ti.
Arlecchino. Mo se no me posso tegnir. Com’èla? Me ne consolo. Ti... Vossignoria ha fatto fortuna.
Brighella. Se ti vedessi mia fia!
Arlecchino. Stala ben Olivetta?
Brighella. Coss’è sta Olivetta?
Arlecchino. Domando umilissimo perdon. Cossa fa l’illustrissima to fia?
Brighella. Se vede ben, che ti gh’ha dell’omo ordenario. La sta ben.
Arlecchino. Me ne consolo.
Brighella. Cossa fa sior Pantalon?
Arlecchino. El nostro patron? El sta ben.
Brighella. E so fia?
Arlecchino. La se fa novizza.
Brighella. Lo so. Col conte Ottavio, n’è vero?
Arlecchino. Sì, con elo. Se ti savessi che cavalier generoso!
Brighella. Eh! lo so. Semo amici.
Arlecchino. Amici?
Brighella. Sì. Avemo disnà insieme anca sta mattina. Se pratichemo con confidenza.
Arlecchino. Mo se l’è un siorazzo grando e ricco.