 |
Questa pagina è stata trascritta, formattata e riletta. | |
| 366 | ATTO SECONDO |
Brighella. Son qua, disè su cossa che volè.
Arlecchino. Se se galantomo, ve sfido co la spada a la man.
Brighella. Me sfide co la spada a la man? Se pol almanco saver la rason?
Arlecchino. La rason te la dirò, quando che t’averò mazzà.
Brighella. Caro amigo, allora sarà troppo tardi. Feme el servizio de dirmela adesso.
Arlecchino. (El vien co le bone, è segno che l’ha paura), (da sè)
Brighella. E cussì? se pol saver?...
Arlecchino. Sior sì. Ve la dirò. V’ho da cavar el cuor per parte de Corallina.
Brighella. Adesso capisso. Vu sè campion de Corallina. Volè combatter per ela.
Arlecchino. Sior sì, e in premio del mio valore, averò la sua destra ed il suo cuore.
Brighella. La so man? el so cuor? a vu? Corallina me vol morto? Se vol vendicar? Ah desgraziada! femena ingrata! traditora! sassina! (passeggiando e smaniando fra sè medesimo)
Arlecchino. (Se vede che el gh’ha una paura de mi terribile. Bisogna farse coraggio) (da sè). Animo, se ti è galantomo, vien a combatter con mi.
Brighella. No me degno de batterme con un omo de la to sorte.
Arlecchino. Perchè ti gh’ha paura.
Brighella. Mi paura?
Arlecchino. Sì, ti è un aseno. L’ha dito anca Corallina.
Brighella. Corallina ha dito che son un aseno?
Arlecchino. La l’ha dito in presenza mia.
Brighella. (Ah1, donna senza amor, senza cuor, senza fede, senza gratitudine, senza pietà!) (smania da sè, passeggiando)
Arlecchino. (El gh’ha paura, el trema). (da sè)
Brighella. (Me vien voggia de chiappar costù, e scannarlo co le mie man). (da sè)
Arlecchino. Animo. Alle curte. Viente a far ammazzar.
- ↑ Pap.: Ah bricconcello! Ah donna ecc.
