Pagina:Goldoni - Opere complete, Venezia 1910, VIII.djvu/206

196 ATTO TERZO

Lugrezia. Oh, maridarme po no! Godo la mia libertà, e me par d’esser una regina.

Giulia. (Oh adesso, co sti mille e ottocento ducati, che bella cossa se fusse vedoa anca mi!) (da sè)

Lugrezia. Sior Todero, vardè ben, che se tornerè a ziogar, perderè i dusento zecchini, e anca el capital de bottega. E vu, sior Boldo, no fe che sta vincita ve ingolosissa, perchè ghe ne xe dei altri che i ha venzo dei terni grossi, e po i ha tornà a zogar tutto.

Giulia. In verità, siora Lugrezia, che parlè ben.

Tonina. In verità che sè una donna de garbo.

Lugrezia. Parlio ben? Songio una donna de garbo? Sareu più zelose de mi? No, n’è vero, fie? No parlemo altro. Quel che xe sta, xe sta. Una volta v’averave fatto desperar quante che sè; ma adesso i anni passa, son vedoa, e no gh’ho più el morbina che gh’aveva una volta. Penso a far bezzi, penso a mantegnirme onoratamente, perchè saveu, fie? dise el proverbio:

          Passando i anni, passa la bellezza,
          Ma de tutto ghe xe, co ghe xe bezzi.
          Una povera donna se desprezza;
          Ma quando la ghe n’ha, se ghe fa i vezzi.
          Che i sia per interesse, o per amor,
          Se accetta tutto, e se consola el cuor.

Fine della Commedia.



  1. Volontà di ridere, scherzare, star sulle burle.