 |
Questa pagina è stata trascritta, formattata e riletta. | |
| LE DONNE GELOSE | 195 |
Chiaretta. Oe, l’anello? La gh’ha l’anello! Siora santola, sior Baseggio gh’ha dà l’anello.
Giulia. Come xelo sto negozio?
Boldo. Gnente, siora. Questo xe un matrimonio che ha fatto siora Lugrezia, e mi gh’ho acconsentìo.
Giulia. Ghe deu dota?
Boldo. Gnanca un bezzo.
Giulia. Brava, siora Lugrezia! Avè fatto ben.
Chiaretta. (Pazenzia! Me manderò de fora). (da sè)
Baseggio. Siora Chiaretta, compatime...
Chiaretta. Eh, andè via, andè via, sior cortesan d’albeoa. Orsetta, ti me la saverà contar st’altr’anno.
Orsetta. De cossa?
Chiaretta. Oh, se ti magnerà el pan pentio!
Orsetta. Invidia, invidia.
Lugrezia. E cussì, siore, sarale più zelose dei fatti mii?
Tonina. Cara siora Lugrezia, compatime. Co se vol ben da senno a so mano, se gh’ha sempre paura che la bissabovab lo porta via.
Giulia. Co se xe de buon cuor, no se pol far de mancoc de no bazzilard.
Lugrezia. Ma no se leva la reputazion a la zente.
Tonina. Via, cossa avemio dito?
Lugrezia. De tutto un poco m’avè dito. Sior Todero, ve darò el zendà, e ve ringrazio de quel che m’ave donà per bonaman de averve fatto vadagnar. Da qua avanti, se vegnissi in bisogno de bezzi, sappiè che pegni no ghe ne fazzo più. I ho fatti per bisogno, perchè giera una povera vedoa, e me pentisso d’averli fatti, perchè le xe cosse che no se pol far. El cielo m’ha provisto de mille e ottocento ducati. Con questi farò qualche negozietto, e procurerò de staccarlae onoratamente. (a Todero)
Giulia. Perchè no se maridela?
