 |
Questa pagina è stata trascritta, formattata e riletta. | |
| LE DONNE GELOSE | 189 |
Arlecchino. I so do marii.
Giulia. Sior Boldo?
Tonina. Sior Todero?
Arlecchino. Le se ferma, le senta. No le sa gnente?
Giulia. Mo de cossa?
Arlecchino. Sior Todero per causa de siora Lugrezia l’ha vadagnà a Redutto dusento zecchini.
Tonina. Mio mario ha vadagnà dusento zecchini?
Arlecchino. Siora sì.
Tonina. Oh siestu benedetto! dove xelo?
Giulia. (Ma! Tutti i muli xe fortunai). (da sè)
Tonina. Ala sentio, siora Giulia?
Giulia. Me ne rallegro.
Arlecchino. E no la sa de sior Boldo? (a Giulia)
Giulia. Via mo.
Arlecchino. Per causa de siora Lugrezia, l’ha vadagnà un terno de mille e ottocento ducati.
Giulia. Eh via!
Arlecchino. L’è cussì da galantomo.
Giulia. Oh co fortuna! Oh co bravo! Ala sentìo, siora Tonina?
Tonina. Me ne consolo. (Ma! Ghe xe differenza da dusento zecchini1 a mille e ottocento ducati2). (da sè, mortificata)
Chiaretta. Oh che caro sior santolo! Oh che gusto che gh’ho anca mi.
Arlecchino. Patrone reverite, vago a spender. I vol far un poco de allegria; se le vol restar servide, le xe parone. (parte)
Giulia. Vardè, vede se xe la verità che mio mario, poverazzo, l’andava là per i numeri del lotto.
Tonina. Anca sior Todero, gramazzo, l’andava per i bezzi. No bisogna farse maraveggia, i xe casi che succede.
Giulia. Oh, a mi ste cosse no le me fa specie.
Tonina. Vorla che andemo a casa?
Giulia. No sentela, che i nostri paroni i xe da siora Lugrezia?
