Pagina:Goldoni - Opere complete, Venezia 1910, VIII.djvu/194

184

ATTO TERZO

Lugrezia. Oe, arecordeve che voggio la sansaria.

Baseggio. Siora sì, ghe darò tutto quel che la vol.

Lugrezia. Sentì, poi esser che gh’abbia bisogno d’una scatola de Franza indorada; me la comprereu?

Baseggio. Siora sì, volentiera. Vago, per no perder tempo.

Lugrezia. Oe, se volè disnar, portevene.

Baseggio. No la s’indubita, faremo pulito.

Lugrezia. Del felippo parlemio altro?

Baseggio. Ghe lo dono, ghe lo dono. (parte)

Lugrezia. Manco mal! Anca questo xe vadagnà, e se no poderò aver la scatola indrìo, sior Baseggio me ne pagherà una. Poverazzo! Se ghe fazzo sto servizio, el me darà altro che una scatola! Mi certo, co posso, fazzo del ben a tutti, ma sempre con onoratezza¹.

SCENA IX.

Sior Todero e siora Lugrezia.

Todero. Siora Lugrezia, patrona, patronazza. (allegro)

Lugrezia. Oe, se molto alegro. Com’èla?

Todero. La senta mo. (fa sonare la borsa^a)

Lugrezia. Caspita. Bezzassi².

Todero. Dusento zecchini.

Lugrezia. Vadagnai?

Todero. Vadagnai.

Lugrezia. A Redutto?

Todero. Tutta sta notte a Redutto.

Lugrezia. Vardè se i mi bezzi xe fortunai; coi diese ducati che v’ho dà, ave fatto sto boccon de vadagno.

Todero. Xe vero, siora Lugrezia; se no la giera ela, no me refava.

Lugrezia. In veritae che gh’ho a caro. Lo sala siora Tonina?

1. Denari assai.

1. Bett. aggiunge: No vôi che i me possa intaccar in t’un bagattin.
2. Bett.: fa sonare i bezzi.