 |
Questa pagina è stata trascritta, formattata e riletta. | |
| LE DONNE GELOSE | 173 |
Chiaretta. De diana! sempre el ghe vol dar? Mo che cuor gh’alo!
Boldo. La me tira a cimento; no la tase mai.
Chiaretta. Se el vedesse come che la pianze! La me cava el cuor.
Boldo. A so danno.
Chiaretta. Mo el gh’ha ben poca carità.
Boldo. Eh fiozza! Son bon anca troppo. Ma co le muggier gh’ha la lengua longa, bisogna deventar cattivi per forza.
Chiaretta. Poveretta! La zelosia la fa parlar.
Boldo. Eh, che la se vaga a far squartar co la so zelosia! Gh’ho altro in testa mi, che ste frascarie. Ghe xe caso che possa aver el mio tabarro?
Chiaretta. El lassa che siora santola ghe lo porta.
Boldo. Oh che pazienza!
Chiaretta. Vorlo?
Boldo. E po crieremo; e po la petuferò da recaoa.
Chiaretta. El vederà, che no la ghe dirà gnente.
Boldo. Sia maledetto!
Chiaretta. Via, caro sior santolo!
Boldo. Che la vegna, che la se destrigab, no gh’ho tempo da perder; bisogna che vaga a far i fatti mii.
Chiaretta. Sior sì, la vien subito. Poverazza! la me fa peccàc. (parte)
Boldo. Oh, se le cosse se fasse do volte! Se resto veduo, no me marido mai più.
SCENA III.
Siora Giulia col tabarro e cappello di suo marito: gli dà il
tabarro senza parlare, e gli vien da piangere.
Boldo. Coss’è? Cossa gh’aveu?
Giulia. Gnente, fio.
Boldo. Voleu gnente fora de casa?
Giulia. Vegnìu a disnar?
