 |
Questa pagina è stata trascritta, formattata e riletta. | |
| 164 | ATTO SECONDO |
Baseggio. (Cara mascara, credeme che ve voggio ben), (a Orsetta)
Orsetta. (Me sposereu?)
Baseggio. (Magari stassera!)
Orsetta. (Vegnì a casa con nu, che parlarè con ela).
Baseggio. (Sì ben, cara; siestu benedetta!) (piano)
Lugrezia. (Me par che i ghe cazza de cola1, e la vecchia dorme). (da sè)
SCENA XXVIII.
Siora Giulia, siora Tonina in bautta, siora Chiaretta in maschera passeggiando, e poi siedono; e detti.
Lugrezia. (Oh per diana de dia, che le cognosso! Vele qua tutte tre, senza un strazzo de omo). (da sè)
Chiaretta. (Quello xe sior Baseggio. Vardelo, vedè? Come che el la sticca2 pulito con quella mascaretta? Baron!) (da sè)
Giulia. (La varda, la varda dove che la xe). (mostrando siora Lugrezia)
Tonina. (Sì ben, che la xe ela. Sola la xe?)
Giulia. (Eh, la troverà compagnia!)
Chiaretta. (Siora santola...) (a Giulia)
Giulia. (Zitto, no se dise cussì. Se dise siora mascara).
Chiaretta. (Chi mai xe quella mascara che parla co sior Baseggio?)
Giulia. (Dov’elo sior Baseggio?)
Chiaretta. (Velo là, vestio da strazzariol).
Giulia. (Oh, sastu chi la xe?)
Chiaretta. (Chi xela?)
Giulia. (No ti la cognossi? Mia nezza Orsetta).
Chiaretta. (E quell’altra?)
Giulia. (So mare).
Chiaretta. (Pulito! S’usa che le mare mena le fie a Redutto a parlar coi morosi?)
