 |
Questa pagina è stata trascritta, formattata e riletta. | |
| LE DONNE GELOSE | 161 |
Arlecchino. Ma! se digo mascara, le xe tutte mascare; bisogna pur distinguer mascara Arlecchin da mascara Lugrezia.
Lugrezia. El diavolo che ve porta. (gli dà una spinta, e lo fa cadere)
Arlecchino. Aiuto.
(Una Mascara che giuoca, chiama) Carte1.
SCENA XXIV.
Servo del Ridottoa e detti.
Servo. Cossa xe, siora mascara? (ad Arlecchino) Ghe xe vegnuo mal? Vorla dell’acqua fresca?
Arlecchino. Gnente, amigo, son cascà.
Servo. L’abbia la bontà de comodarse, e no far sussurro. A Redutto no se fa sti strepiti. (parte)
Lugrezia. (Adessadesso custù me fa svergognar anca mi). (da sè)
Arlecchino. Son qua, siora mascara... (a Lugrezia)
Lugrezia. Ande là, andè a spazzizarb.
Arlecchino. Sangue de mi, gn’ho do ducatelli d’arzento, me vien voia de andarli a rischiar.
Lugrezia. Via sì, andè, da bravo, e po tornè qua.
Arlecchino. Vôi rischiar la mia fortuna. (va per andar via)
Lugrezia. Oe, mascara. (Arlecchino seguita ad andare) Mascara. (Arlecchino come sopra) Mascara. Ih!
Arlecchino. A mi?
Lugrezia. Sì. Vegnì qua. Seu sordo? (Arlecchino torna da Lugrezia)
Arlecchino. La compatissa. Credeva che all’omo se ghe disesse mascaro.
Lugrezia. Gh’avè rason: alle mascare come vu, se ghe dise mascarotto. Sentì, zoghemoli a mità quei do ducati.
Arlecchino. Volentiera. Me ne dala altri do?
Lugrezia. Intanto zoghè quelli, e po vegnì qua.
- ↑ Bett.: Omo del Redutto. Poi segue: «Omo. La comandi. La maschera gli dice piano: Coss’è quel sussurro? Omo. Cossa xe ecc.».
