 |
Questa pagina è stata trascritta, formattata e riletta. | |
| 158 | ATTO SECONDO |
Lugrezia. Tocco de frasconazza, cossa xe sti tiria?
Chiaretta. Se ghe li ha dai sior Baseggio, che la se li goda.
Lugrezia. Cossa v’importa a vu, siora, che me li abbia dai Polo o Martin?
Chiaretta. Cossa diavolo gh’ala, che tutti i omeni ghe corre drio?
Lugrezia. Senti che pettazza!
Chiaretta. A mi pettazza!
Giulia. Cussì strapazzè mia fiozza? (a Lugrezia)
Tonina. No portè respetto a una putta? (a Lugrezia)
Lugrezia. E a mi perchè no me portela respetto?
Chiaretta. Sior Baseggio m’ha contà tutto.
Lugrezia. Xelo el vostro moroso, siora?
Chiaretta. Se el fusse el mio moroso, son una putta.
Lugrezia. Per esser putta, gh’avè molto la lengua longa, patrona; basta dir che sè campagnola.
Chiaretta. Coss’è sta campagnola? Son cettadina.
Lugrezia. Lustrissima. (con caricatura)
Tonina. Oh che calèra!
Giulia. Oh che sbrega1!
Lugrezia. Ah sporche, frascone, pettegole quante che se! Me tolè in mezzo? In tre vegnì contra de mi sola? Credeu de metterme in suggizion? Son una donna prudente, no voggio farme menar per lengua; del resto, ve daria tanti schiaffi, quanti che ghe ne podessi portar.
Tonina. Schiaffi?
Giulia. A nu schiaffi?
Chiaretta. Schiaffi? (tutte e tre vanno per dargli, e Lugrezia tira fuori uno stilo)
Lugrezia. Stè in drio, che fazzo sangue. (le minaccia con lo stilo)
Tonina. (La gh’ha el stilo!) (a Giulia, ritirandosi)
Giulia. (Oh che diavolo de donna!) (a Tonino, ritirandosi)
Chiaretta. El stilo? Me la battob. (parte)
