 |
Questa pagina è stata trascritta, formattata e riletta. | |
| LE DONNE GELOSE | 155 |
Tonina. Se scaldela, siora Lugrezia?
Lugrezia. Xe un pezzo che me n’accorzo, che la me varda per sbiegoa. No son miga orbab, sala?
Tonina. Se no la xe orba ela, no xe orbi gnanca i altri.
Lugrezia. Cara ela, la me la spiega in volgar.
Tonina. A una dottora della so sorte, me par che poche parole doverave bastar.
Lugrezia. Siora Tonina! la varda ben come che la parla!
Tonina. L’oi strapazzada?
Lugrezia. Vegnimo alle curte. Cossa gh’ala coi fatti mii?
Tonina. Cossa vorla che gh’abbia? Gnente.
Lugrezia. Se la xe una donna onorata, la m’ha da dir cossa che la gh’ha.
Tonina. La va tanto drio, che bisognerà po che parla.
Lugrezia. Via, la diga.
Tonina. Mio mano vienlo mai da ela?
Lugrezia. Siora sì.
Tonina. Bon! basta cussì.
Lugrezia. E se el vien, el vien in t’una casa da ben, e onorata.
Tonina. Cossa vienlo a far in casa soa?
Lugrezia. La ghe lo domanda a elo, che la lo saverà.
Tonina. E ela no la me lo pol dir?
Lugrezia. Siora no; son una donna prudente, e no ghe lo posso dir.
Tonina. Se la fusse una donna prudente, la me lo dirave.
Lugrezia. Oh la senta, ghe lo dirò anca. Per levarghe i pulesi de testa, ghe lo dirò. Gh’ho impresta dei bezzi, acciò che el paga i so debiti.
Tonina. Eh cara siora, no la me vegna a contar de le fiabec. Mio mario no xe in sto stato. Nol gh’ha debiti, nol gh’ha bisogno de tior bezzi da nissun. Grazie al cielo, el gh’ha un bon negozio mio mario.
Lugrezia. Co sarave a dir, no la me crede.
Tonina. Eh cara siora, xe un pezzo che se cognossemo.
