 |
Questa pagina è stata trascritta, formattata e riletta. | |
| 152 | ATTO SECONDO |
Lugrezia. Via, destrigheve.
Arlecchino. Siora Lugrezia, èla in collera?
Lugrezia. Eh!
Arlecchino. Ela in collera, siora Lugrezia?
Lugrezia. No, no son più in collera, destrigheve.
Arlecchino. M’aspettela qua, siora Lugrezia?
Lugrezia. Me vegnirè a tor qua da siora Tonina. Vago un poco a trovarla, che xe un pezzo che no la vedo.
Arlecchino. La sarà servida, siora Lugrezia.
Lugrezia. Ma sentì; co vegnì, battè e feme chiamar, ma no disè miga chi sè, savè?
Arlecchino. No? Per cossa, siora Lugrezia?
Lugrezia. Perchè no voggio che i sappia che me fazzo compagnar dal facchin.
Arlecchino. No son miga un baron, siora Lugrezia.
Lugrezia. Oh, m’ave pur seccà co sta siora Lugrezia.
Arlecchino. Vôi mo dir...
Lugrezia. O destrigheve, o andeve a far squartar.
Arlecchino. Vago subito, siora Lugrezia.
Lugrezia. Ande, sior mala grazia, andè, sior aseno.
Arlecchino. (Questo l’è el solito pagamento de le mie fadighe). (da sè, va in casa di Lugrezia)
SCENA XVII1.
Lugrezia sola.
In verità che la xe da rider. Custù, più despetti che ghe fazzo, più che ghe digo roba, el me xe più drio, el me fa tutto, e nol me costa un bezzo. Anca questo xe un utiletto, che no xe cattivo. A bon conto me farò compagnar a Redutto, e lo farò star con mi, finche troverò qualchedun che cognosso. Za no son miga sola, che fazza immascherar un facchin o un servitor. Ghe ne xe de quelle poche, che fa cussì. Col xe in mascara nissun lo cognosse, nol me dà suggizion, e lo posso licenziar
- ↑ È unita alla scena prec. nell’ed. Bett.
