 |
Questa pagina è stata trascritta, formattata e riletta. | |
| LE DONNE GELOSE | 151 |
Arlecchino. Starò anca mi in conversazion.
Lugrezia. Oh, no le xe conversazion per vu, sior. Andarè a far i fatti vostri.
Arlecchino. Ma co la se degna che la compagna, la se pol degnar che staga con ela.
Lugrezia. Me fazzo compagnar da vu, perchè no gh’ho altri.
Arlecchino. Da resto1... de mi no la se degna...
Lugrezia. La saria bella, che un tocco de facchin se mettesse in ganzegaa.
Arlecchino. La perdona se la compatisso. A bon reverirla.
Lugrezia. Dove andeu, sior?
Arlecchino. Vago via, perchè no son degno...
Lugrezia. Animo, andeve a immascherar, e vegnì con mi.
Arlecchino. No vorria che la fusse troppa confidenza...
Lugrezia. Animo, digo, se no, no mettè più nè pie, nè passo in casa mia.
Arlecchino. Siora Lugrezia, no la vaga in collera.
Lugrezia. Più finezze che se fa a sto aseno, se fa pezob.
Arlecchino. Siora Lugrezia, no la me strapazza.
Lugrezia. Ghe fazzo sto onor de vegnir con mi in mascara, e sta carogna se fa pregar.
Arlecchino. Siora Lugrezia, no la me diga carogna.
Lugrezia. Animo, andeve a immascherar.
Arlecchino. Dove, siora Lugrezia?
Lugrezia. Ande da Menega, e immaschereve.
Arlecchino. Come, siora Lugrezia?
Lugrezia. Gh’ho lassà fora un codegugno, un tabarro, una bautta e un cappello.
Arlecchino. Anca el volto, siora Lugrezia?
Lugrezia. El volto costa quattordese soldi. Menega li ha spesi ela, degheli.
Arlecchino. Siora sì, volentiera.
- ↑ Così Zatta; Bett. e Pap.: de resto.
