 |
Questa pagina è stata trascritta, formattata e riletta. | |
| LE DONNE GELOSE | 145 |
SCENA VIII.
Camera in casa di Tonina.
Siora Tonina sola.
Cossa fale che no le vien? Oe, Tonia, gh’astu averto? Sorda, dove xestu? Ghe zogo mi che la xe sul balcon a veder le mascare. Andarò mi.
SCENA IX.
Siora Giulia, siora Chiaretta e detta.
Chiaretta. Oh patrona, siora Tonina.
Tonina. Patrone, siore mascare.
Glulia. Patrona, fia, patrona.
Tonina. Cossa fale, stale ben?
Giulia. Ben, e ela?
Tonina. Cussì da vecchia.
Chiaretta. Oh cara sta vecchietta!
Tonina. Via, la se cava zoso, la fazza conto d’esser in casa soa.
Giulia. Grazie, siora Tonina. (si smaschera)
Chiaretta. Passa assae mascare ancuo? (a Tonina, smascherandosi)
Tonina. No so da senno. Me son buttada un pochetto al balcon, ho visto una certa cossa che no m’ha piasso, e son vegnua subito drente
Giulia. Ala visto sì?
Tonina. Ala visto anca ela?
Giulia. Là da l’amiga?
Tonina. Siora sì.
Giulia. Ah, l’ha visto tutto donca?
Tonina. M’ho imbattù giusto in quello.
Giulia. Cossa disela?
Tonina. Cossa vorla che diga?
Giulia. Ah povere muggier! (ciascheduna per equivoco intende del marito dell’altra)
