![]() |
Questa pagina è stata trascritta, formattata e riletta. | ![]() |
LE DONNE GELOSE | 143 |
Boldo. Una desgrazia, siora Lugrezia.
Lugrezia. Cossa xe sta?
Boldo. Do numeri chiusi.
Lugrezia. Oh poter del diavolo! Che numeri xeli?
Boldo. L’8 e il 90.
Lugrezia. In verità che me l’ho insuniàa. El voleva dir che i sarà chiusi. Co ho visto el svolo1, me par che volesse andar su un palco; e vien uno, el dise: dove vaia, siora mascara? Sul palco, digo. Oh! no ghe xe più liogo, el dise. (s’apre la porta)
Boldo. I ha averto; vegno de suso. (Boldo va in casa)
Lugrezia. Vegnì, vegnì, che ve conterò. (Lugrezia si ritira)
SCENA V.
Siora Tonina alla finestra.
Oe! sior Boldo xe andà da siora Lugrezia. Se siora Giulia lo savesse, poverazza, la se despereria: manco mal che no la l’ha visto. Gh’ho gusto che no la lo sappia; e sì ancuo l’ha da vegnir da mi; se podeva dar benissimo che la lo vedesse. Oh che cara siora Lugrezia! Adesso l’ho scoverta come che va. Manco mal che mio mano no ghe anderà più; el me l’ha promesso.
SCENA VI.
Siora Giulia in tabarro e bautta. Siora Chiaretta
in mascherab, e detta.
Tonina. Chi mai xe ste mascare che varda in qua?
Chiaretta. (Saluta Tonina con le mani.)
Tonina. Adesso le cognosso. Patrone, patrone. Le resta servide. Toniac, averzighe. (va dentro)
- ↑ Bett. aggiunge: col volto natural.