 |
Questa pagina è stata trascritta, formattata e riletta. | |
| 142 | ATTO SECONDO |
Lugrezia. Mascara, ve ringrazio.
E se gh’ho roba bella,
Tutta la xe per ella;
Ma se la gh’ha qualcossa,
Che comodar me possa,
No la la tegna sconta,
Che la monea xe pronta.
Ghe darò più che posso,
Contratterò all’ingrosso.
Me basta in carneval
Salvar el capital.
Stufarlaa no vorria,
Chiappo su, e vago via.
Chi ha drappi vecchi,
Chi ha cuori d’oro vecchi da vender. (parte)
Lugrezia. Oh che caro matto! El gh’ha speso ben el zecchin in te l’abito.
Orsetta. Voggio andarghe drio. (sua madre fa moto di no) Ghe digo che voggio andarghe drio. (la madre la trattiene) Se no la vol vegnir ela, che la lassa star. (parte correndo, e la madre la seguita1)
Lugrezia. Mo se vede i gran spettacoli de mascare. Quella vecchia xe la mia tentazion. Pagarave do soldi a saver chi la xe.
SCENA IV.
Sior Boldo e siora Lugrezia.
Boldo. Siora Lugrezia, vegno da ela.
Lugrezia. Patron sior Boldo, el resta servido. Oh, sia malignazzo! Se m’ha rotto la corda. Menega, va da basso a averzer la porta, che se m’ha rotto la corda.(parla rivolta al di dentro)
- ↑ Annoiarla.
- ↑ Bett.: Ors. va via pilotando [spieg.: camminando con passi corti e frequenti, e dimenandosi alquanto], e so mare ghe corre drio con fadiga.
