 |
Questa pagina è stata trascritta, formattata e riletta. | |
| 138 | ATTO PRIMO |
Cossa songio, un puttelo? Anca questa ghe vorria! Mi porto le braghesse, e vu impazzevene in te la vostra roccaa.
Giulia. Eh via! Co la se scalda tanto, so che ora che xe.
Boldo. Cossa voravela dir, patrona?
Giulia. La scatola el l’averà donada via.
Boldo. A chi, cara ela?
Giulia. Alla bella vedovella. (con caricatura)
Boldo. Te dago una sleppa che la terra te ne dà un’altra.
Giulia. Mo za. Subito sleppe. Subito se parla de dar. Deme, mazzeme, leveme da sti affanni de sto mondo. (piange)
Boldo. Oh che gran affanni! che gran desgrazie! Povera matta. Via, andemo a tola.
Giulia. Ande vu, sior; no vôi magnar tanto tossegob. (piange)
Boldo. Mo via, ve digo. Se ho dito de darve una sleppa, ho fatto per burla.
Giulia. Tocco de can! E quelle che ti m’ha dà da senno? Ti me tratti co fa una bestia. (piange)
Boldo. Almanco per quella putta.
Giulia. Gh’ho el cuor ingroppà. (piange)
Boldo. Via, feme pianzer anca mi. (gli vien da piangere)
SCENA XVIII.
Siora Chiaretta e detti.
Chiaretta. Xe manestrà... Pianzeli?
Boldo. Andemo. (Vien via, che faremo pase). (a Giulia)
Giulia. (Baron! Te voggio tanto ben e ti me tratti cussì). (piano a Boldo, e parte con lui)
Chiaretta. Tra mario e muggier sempre i cria, sempre i se rosega, sempre i pianze! I me fa scampar la voggia de maridarme.
Fine dell’Atto Primo.
