 |
Questa pagina è stata trascritta, formattata e riletta. | |
| LE DONNE GELOSE | 131 |
sarà tempo, la discorreremo! Maridarme voggio. Tiorò quella che me saverà meggio dar in tel genio.
SCENA XI.
Siora Lugrezia col codegugno e camisiola de sior Todero, e detto.
Lugrezia. Ande là, che se fortunà.
Baseggio. Mo gh’ho ben a caro da senno.
Lugrezia. Vardè che codegugno!
Baseggio. Oh bello!
Lugrezia. Vardè che camisiola.
Baseggio. Superbonazzaa.
Lugrezia. V’anderala ben?
Baseggio. A occhio me par de sì.
Lugrezia. A caso ho alzà el sagiaorb e ho trovà averto.
Baseggio. Ghe son tanto obbligà, siora Lugrezia.
Lugrezia. Ma no vorria che la l’avesse impegnada sta roba.
Baseggio. Impegnada, o no impegnada, la togo suso, e la porto via.
Lugrezia. Mo a pian. Cossa ghe dalo de nolo?
Baseggio. Cossa ghe par a ela che ghe possa dar?
Lugrezia. Mi de ste cosse no me ne intendo, ma stamattina la m’ha dito che de sti do caic l’ha refudà gieri diese lire al zorno.
Baseggio. Ih! troppo.
Lugrezia. Mi no so cossa dir. Vedo anca mi che xe troppo, ma mi no son patrona e no me ne voggio impazzar.
Baseggio. Ghe darò sie lire.
Lugrezia. No no1, sior; la xe una donna tanto suttila, che la me magnarave i occhi. Co no ghe comoda per un felippo2, mi no ghe la lasso portar via.
Baseggio. Ghe vol pazienza. Ghe darò un felippo; doman, co vegno co la roba, ghe lo porterò.
