 |
Questa pagina è stata trascritta, formattata e riletta. | |
| LE DONNE GELOSE | 119 |
SCENA V1
Chiaretta e Orsetta.
Chiaretta. Ghe ne passa assae mascare dove che sta siora Tonina?
Orsetta. No voleu! Ghe ne passa un mondo. La sta in Frezzariaa.
Chiarettta. Cossa soggio mi de Frezzaria? No son miga pratica mi de Venezia.
Orsetta. Oh, mi almanco so andar per tuto.
Chiaretta. Andeu a spasso?
Orsetta. Varè! Seguro che vago.
Chiaretta. Con chi andeu?
Orsetta. Co mia siora mare. Oe, la me mena per tutto. Anca l’altro zorno semo stae a bever el caffè.
Chiaretta. Chi ve l’ha pagà?
Orsetta. Cognosseu sior Baseggio?
Chiaretta. Quello dall’altro zorno?
Orsetta. Sì ben, quello che n’ha dà i confetti.
Chiaretta. Quello v’ha paga el caffè?
Orsetta. Siora sì. Varè che maraveggie!
Chiaretta. Via, via, gh’ho a caro. (con ironia)
Orsetta. Oe, no ti sa?
Chiaretta. Cossa?
Orsetta. Sior Baseggio... Ma vardè ben no dir gnente a sior’àmia.
Chiaretta. No, no, no ve dubitè.
Orsetta. El me vol ben.
Chiaretta. Sì, gh’ho a caro.
Orsetta. Cossa gh’aveu che me pare sbattuettab?
Chiaretta. Gnente. Cossa voleu che gh’abbia?
Orsetta. Sentì, Chiaretta. Mi son una putta schietta e sincera. Se gh’avè qualche pretension su sto putto, disemelo liberamente.
- ↑ È unita alla scena precedente nell’ed. Bett.
