 |
Questa pagina è stata trascritta, formattata e riletta. | |
| I PETTEGOLEZZI DELLE DONNE | 493 |
SCENA XVI.
Arlecchino all’osteria e detto.
Arlecchino. O de ruffe, o de raffe, ho magnà qualcossa; e per ancuo stago ben.
Beppo. Sior Arlecchin, diseme, caro vu, za che vegnì da quell’osteria, aveu visto Checchina?
Arlecchino. Oh, se l’ho vista!
Beppo. Cossa fala all’osteria?
Arlecchino. L’è in t’una camera col me padron.
Beppo. Oh Dio! A cossa far?
Arlecchino. Qui potest capere, capiat1. (parte)
Beppo. Ma chi l’avesse mai dito, che una putta de quella sorte avesse da buttar cussì mal! Ma, oh Dio! Ho paura che l’abbia perso el cervello, e che per causa mia la sia deventada matta.
SCENA XVII.
Salamina, Musa, Toni, Pantalone e Beppo.
Pantalone. Oh, velo qua. Ve cerchemo per tutto.
Toni. Xe qua el pare de Checca, che xe contento che la spose, e ve voi abbrazzar.
Beppo. Che bel matrimonio che me vonessi far far!
Toni. Perchè?
Beppo. Parme sposar la fia de Bagiggi?
Toni. Chi v’ha dito sta bestialità?
Musa. Mi non avira fiola.
Pantalone. Falè, compare, falè.
Salamina. Signore, io sono il padre di Checchina, e sono un mercante onorato.
Beppo. Vu sè? Questo xe el pare da Checca? (a Toni)
Toni. Sì ben, questo. Un omo civil, che xe sta in gran fortune, e che ghe tornerà in poco tempo.
- ↑ L’ed. Zatta sostituisce con dei puntolini queste parole.
