 |
Questa pagina è stata trascritta, formattata e riletta. | |
| 492 | ATTO TERZO |
Sgualda. Eh, no ve travaggiè no, che la sta ben.
Beppo. Per carità, diseme, dove xela?
Cate. Oe, la xe là all’osteria.
Beppo. All’osteria? A cossa far?
Sgualda. A devertirse.
Beppo. Con chi xela?
Cate. Con un paregin1 in perrucca.
Beppo. Ah siora Cate! vu me buriè.
Cate. Oe, Sgualda, el dise che lo burlo.
Sgualda. Saveu chi ve burla? Quella desgraziada de Checca. La xe all’osteria con un foresto.
Beppo. Oimè! Cossa sentio?
Sgualda. E se no credè, andè drento e vedere.
Cate. Oe, abbrazzai i giera. No ve digo altro. (m atto di partire)
Sgualda. Oe, el se l’ha portada drento. (in atto di partire)
Cate. Qua in prubricoa, senza suggizion.
Sgualda. Oe, la gh’ha el foresto.
Cate. Povero putto! Me fè pecca. (parte)
Sgualda. Altro che bagiggi! La xe roba da osteria. (parte)
Beppo. Gnancora noi posso creder. Ste pettegole no le merita fede. No, no sarà vero. Ma me voggio chiarir. Oe dall’osteria: gh’è nissun?
SCENA XV.
Cameriere e detto.
Cameriere. Cosa comanda?
Beppo. Diseme, caro vu, cognosseu Checchina fia de paron Toni?
Cameriere. La cognosso seguro, anzi l’è de su in t’una camera con un forastier.
Beppo. In t’una camera con un forastier! Cossa fali?
Cameriere. Mi no cerco i fatti dei altri. Servitor umilissimo, (parte)
Beppo. Ah povero Beppo, tradìo, sassinà.
- ↑ Pubblico.
- ↑ Parigino, bellimbusto: v. Boerio.
