Pagina:Goldoni - Opere complete, Venezia 1909, VI.djvu/498

486 ATTO TERZO

Checca. Sappiè che xe vegnù a Venezia mio pare vero.

Beppo. Eh, el so, el so.

Checca. Cos’è, gh’aveu paura che nol voggia che ve toga? Gh’aveu paura che nol se degna?

Beppo. Come! che nol se degna? Un omo de quella sorte no s’ha da degnar de mi? M’aveu in concetto che sia pezzo de vostro pare?

Checca. Mo cossa xelo mio pare? I m’ha dito che el xe un marcante.

Beppo. SI ben, un marcante che gh’ha un bon negozio. L’aveu visto? Lo cognosseu?

Checca. No l’ho gnancora visto.

Beppo. Saveu chi el xe vostro pare?

Checca. Via mo, chi xelo?

Beppo. Ah pazienzia!

Checca. Via, diseme chi el xe.

Beppo. Povera Checchina!

Checca. Chi xelo? El boggia1?

Beppo. El xe quell’omo che vende i bagiggi.

Checca. Quello... mio pare?

Beppo. Me schioppa el cuor... no posso più.

Checca. Caro Beppo, me par impussibile.

Beppo. Pur troppo xe la verità.

Checca. Donca cossa sarà de mi?

Beppo. Mio sior pare no vorrà che ve sposa.

Checca. E vu me lasserè?

Beppo. E mi morirò.

Checca. Ah, se me volessi ben, no diressi cussì.

Beppo. Cara Checca, mio sior pare xe un omo civil; el serve da fattor, ma el xe nato ben. Gh’ho dei parenti che xe più de mi... Oh Dio! No so quala far...

Checca. Via, lasseme, abbandoneme. So mi cossa che ho da far.

Beppo. Cossa gh’aveu intenzion de far?

  1. Bett., in nota: Ministro di giustizia.