 |
Questa pagina è stata trascritta, formattata e riletta. | |
| 480 | ATTO TERZO |
come i giera stai qualche anno in Levante, i ha dà da intender a Venezia, che la giera so fia.
Checca. Via, sior, me direu più che sia una bastarda? (a Beppo)
Beppo. Mi no ve dirò gnente; ma no se sa gnancora chi sia vostro pare.
Pantalone. Co mi ve assicuro che la xe fia de un omo civil, de un bon marcante che gh’ha la disgrazia d’esser schiavo, ma che xe un galantomo, no ve basta? Me credeu a mi, che son vostro compare?
Beppo. Sior sì, ve credo, e xe tanto el ben che voggio a Checca, che tutto me basta, purchè possa salvar in qualche modo la mia reputazion.
Pantalone. Via, seguite a volerve ben, e lassè andar la malinconia.
Beppo. Cara la mia cara Checchina. (si accosta)
Checca. Via, sior, andè via de qua, che son una bastarda. (sdegnosa)
Pantalone. Vedeu? La xe instizzada.
Beppo. Mo via, no me tormentè. Savè che ve voggio ben.
Checca. Se m’avessi volesto ben, no averessi dito de volerme lassar.
Pantalone. Sentìu? La gh’ha rason.
Beppo. Sia malignazzo chi xe sta causa.
Pantalone. Causa i pettegolezzi. Ma via, quel che xe stà, xe stà. Fenimola, e no ghe ne parlemo più. Vegnì qua, deme la man. (a Beppo)
Beppo. Volentiera, sior compare.
Pantalone. Anca vu, comare, de qua.
Checca. Mi no, vede.
Pantalone. Perchè mo no?
Checca. Perchè son una mu...
Pantalone. Zitto là, no disè più ste brutte parole. Deme la man.
Checca. No ve vôi dar gnente.
Pantalone. Via, no ve fè pregar.
Checca. Ve digo de no.
Pantalone. Sentì, se sarè ustinada, i dirà che xe la verità che se mu...
