 |
Questa pagina è stata trascritta, formattata e riletta. | |
| I PETTEGOLEZZI DELLE DONNE | 445 |
SCENA VI1.
Donna Sgualda con roba da vendere, e detta.
Sgualda. Oe, Cate, qua ti xe?
Cate. Son qua che porto i drappi. Cossa distu de quelle lustrissime?
Sgualda. Cara ti, tasi, che ti me fa vegnir el mio mal.
Cate. Cosa gh’astu de bello da vender?
Sgualda. Oh’ho una bella carpettaa e una bella vestina. Ti che ti pratichi per ste case, varda de farmela dar via.
Cate. Perchè no? Che la mostristu a Checca?
Sgualda. No la xe miga roba da par soo.
Cate. Oh, cossa distu? No ti vedi in che boccon de aria che i l’ha messa?
Sgualda. Certo che quel mio zerman xe un pezzo de matto a spender tanti bezzi intorno so fia.
Cate. Credistu che el spenda elo? Uh, povera matta!
Sgualda. Mo chi spende?
Cate. Oe! sior compare.
Sgualda. chi? Sior Pantalon?
Cate. Giusto elo.
Sgualda. Mo se no l’ha compra gnanca quattro confetti!
Cate. Ben; nol pol miga far tante cose. Co el li spende da una banda, no el li spende dall’altra.
Sgualda. E mio zerman no dise gnente?
Cate. Cossa vustu che el diga? El lassa che i fazza.
Sgualda. Lo compatisso; finalmente no la xe so fia.
Cate. Cossa distu? Checca no xe so fia?
Sgualda. Oe, me promettistu da donna onorata de no dir gnente a nissun?
Cate. Oh, no gh’è pericolo che parla.
Sgualda. Varda ben, veh? No lo dirave a nissun a sto mondo, altri che a ti.
- ↑ Gonnella.
- ↑ È sc. IV nell’ed. Bett.
