 |
Questa pagina è stata trascritta, formattata e riletta. | |
| 442 | ATTO PRIMO |
Pantalone. Seu zeloso? Son vostro compare.
Beppo. La diga, sior Pantalon, co el compare l’ha dà1 l’anello, l’ha fenio?
Pantalone. Sì ben, se volè, averò fenio.
Toni. Eh via! Seu matto? No cognossè sior Pantalon? No savè che omo ch’el xe?
Pantalone. Compare, xe 24 ore sonae. Ho desparecchià, ho desarmà la barca, e no so più bon da vogar.
Beppo. Oh che caro sior Pantalon! El me fa da rider. Via, vardè se fazzo pulito. (mette l'anello a Checca)
Checca. Me sposelo adesso?
Toni. Siora no, el ve dà el segnoa.
Checca. Che bisogno ghe xe de segno? El me pol sposar alla prima.
Toni. Bisogna far le cosse una alla volta.
Checca. Oh, co bello che el xe sto anello!
Pantalone. Ve piaselo?
Checca. Me piase l’anello, ma me piase più chi me l’ha dà.
Pantalone. Mi ve l’ho dà.
Checca. Eh, digo chi me l’ha messo in deo.
Pantalone. Oh putti, me consolo. Vago a far i fatti mii. El ciel ve benediga; se ve bisogna qualcossa, comandème. (Oh che bella cossa che xe l’esser zoveni! Ma pur, siben che son vecchio, sta fonzion la farave anca mi. Fina el segno lo daria, ma per de più no me posso impegnar). (da sè, e parte)
SCENA IV2.
Checca, Beppo, paron Toni.
Toni. Via, Beppo, se ave da far qualcossa, andè.
Beppo. Eh, non ho da far gnente.
Toni. Se no gh’ave da far vu, ho da far mi; andemo.
- ↑ Quasi pegno.
