 |
Questa pagina è stata trascritta, formattata e riletta. | |
| 280 | ATTO SECONDO |
SCENA XIII.
Strada.
Pantalone e Brighella.
Pantalone. Brighella, son desperà. Brighella, son morto. Brighella, no posso più.
Brighella. Cos’è sta, sior Pantalon?
Pantalone. Non trovo in nessun luogo mia fia. Da mia sorella no la xe più tornada; a casa mia no la xe vegnua; da so zermana no la xe mai stada; xe do ore che la manca co quella desgraziada de Colombina; no se sa dove che le sia andae; no se pol saver dove che le sia. Poveretto mi! Rosaura, fia mia, dove xestu, anema mia? Ah, che daria per recuperarla el mio sangue, el mio scrigno, el mio cuor.
Brighella. Sior Pantalon, me meraveio che la daga in tutte ste smanie. Adesso in sto ponto vegno mi da casa de siora Gandolfa, e la siora Rosaura l’è in casa, e l’ho vista mi coi mi occhi.
Pantalone. Diseu dasseno? Oh cielo, te rengrazio! Ma la sarà vegnua a casa, dopo che mi son andà via.
Brighella. Oh giusto! l’è stada sempre in casa.
Pantalone. Ma dove gierela, che non l’ho trovada in nissun logo?
Brighella. L’era in soffitta.
Pantalone. Cossa favela?
Brighella. Mi no so gnente. Le donne gh’ha delle ore, che no le vol che se sappia cossa che le fazza.
Pantalone. E Colombina?
Brighella. L’era in compagnia della so patrona.
Pantalone. Ho chiamà, e no le m’ha sentìo?
Brighella. Le ha sentido.
Pantalone. Mo perchè non hale resposo.
Brighella. Perchè le non doveva poder responder.
Pantalone. Vu me mette in qualche sospetto.
Brighella. Volela so fia?
Pantalone. La voggio certo.
