 |
Questa pagina è stata trascritta, formattata e riletta. | |
| IL CAVALIERE DI BUON GUSTO | 175 |
Brighella. Dove, caro ti?
Arlecchino. A so comare.
Brighella. Tutto a so comare?
Arlecchino. Sior sì, e mi l’obbediva con tutta fedeltà. Savì mo perchè? Perchè, co l’occasion della comare, anca mi robava col sior compare.
Brighella. Sto mistro de casa l’era un galantomo.
Arlecchino. Oh, el me voleva un gran ben! La mattina a bonora l’andava mi a desmissiar1.
Brighella. Dove dormivelo?
Arlecchino. In casa de so comare.
Brighella. Pulito.
Arlecchino. Una volta l’era ammalà, e se credeva che el morisse, che mi aveva un dolor terribile. Ho dà più maladizion a chi l’ha fatto ammalar.
Brighella. Chi l’ha fatto ammalar?
Arlecchino. So comare.
Brighella. Sto mistro de casa me l’arrecordo, che no l’è gran tempo che l’è andà via.
Arlecchino. Mi so per cossa che l’è andà via.
Brighella. Via mo, per cossa?
Arlecchino. Per so comare; e adesso so cossa che el fa.
Brighella. Cossa falò, caro ti?
Arlecchino. El batte l’azzalin2; e savìu3 a chi?
Brighella. A chi?
Arlecchino. A so comare.
Brighella. Oh vedistu mo, mi no gh’ho comare, mi no mando gnente a nissun, servo il mio padron onoratamente. La servitù la impiego in cosse lecite e oneste, e voio esser obbedio. Animo, tira avanti quelle careghe.
Arlecchino. Via, tira avanti quelle careghe. (a servitori)
Brighella. Digo a ti.
Arlecchino. E mi a ti.
