della signora avversaria ha concesso so fia all’Aretusi, altrimenti nol ghe l’averave dada. Perchè no s’halo fatto far una piezaria1 dalla siora Ortensia de far divorzio da so mario? Ma bisogna che sta piezaria o ela, o qualchedun altro, ghe l’abbia fatta, perchè su sta fede l’ha collocà le altre do fie, a quelle el gh’ha dà tutto, e questa nol l’ha considerada per gnente. L’è morto senza gnente, e ela no la gh’ha gnente. Da sto fatto l’avversario desume una rason, che s’abbia da laudar2 la donazion, perchè una povera putta no abbia da restar affatto despoggia. Xe ben che la sia vestida, ma se per vestirla ela s’ha da spoggiar un altro, più tosto che la resta nua, che la troverà qualchedun che la vestirà. La resta senza casa e senza alimenti? Mo no gh’ala el sior zio, che xe fradello del padre, e che xe obbligà in caso de bisogno a soccorrer i so nevodi? Dopo che l’avvocato avversario ha dito ste belle cosse, el s’ha impegna de provarle tutte, perchè i giurisconsulti della so sorte se vergogna parlar senza i testi alla man. Ma el s’ha ridotto a provarghene una sola, e saria sta meggio per lu che nol l’avesse provada, perchè la so prova, prova contra de lu medesimo. El dixe: non osta l’obbietto della sopravenienza dei fioi, perchè questa opera quando la donazion xe fatta all’estraneo, no quando l’è fatta a qualch’altro fìol. La fia adottiva se paragona al fiol legittimo e natural, ergo la donazion no xe revocabile. Falso argomento, falsissima conseguenza. El fio adottivo se considera come legittimo e natural, quando manca el legittimo e natural. Co i xe in confronto, el fio per elezion cede al fio per natura, ma de più, se se trattasse de do fioi legittimi e naturali, e el padre avesse donà a uno per privar l’altro, no tegnirave la donazion. Più ancora, se el padre avesse donà a un unico fio legittimo e natural, e dopo ghe nassesse uno o più fioi, sarave revocada la donazion; donca molto più la va revocada nel caso nostro, nel qual se tratta de escluder un fio a fronte d’una straniera. Ecco i gran obbietti, ecco le terribili prove. Tutte
- ↑ Piezaria, mallevadoria. [nota originale]
- ↑ Laudar, termine del Foro veneto, che significa confermar. [nota originale]
