 |
Questa pagina è stata trascritta, formattata e riletta. | |
| 354 | ATTO SECONDO |
SCENA XI.
Pantalone solo.
Vardè che bell’omo! Vardè in che bella casa che ho messo la mia povera fia! Un de sti dì, co ste so medaggie nol gh’ha più un soldo, e quel che xe pezo, el lassa che vaga in desordene la casa, senza abbadarghe. Ma se nol ghe bada lu, ghe badarò mi. No gh’ho altro a sto mondo che sta unica fia; se posso, no vôi morir col rammarico de vederla malamente sagrificada. Oh quanto meggio che giera, che l’avesse maridada con uno da par mio! Anca a mi me xe vegnù el catarro della nobiltà. Ho speso vintimille scudi. Ma cossa hoggio fatto? Ho butta i bezzi in canal, e ho negà la putta1.
SCENA XII.
Arlecchino, travestito con altr'abito, e detto.
Arlecchino. (Oh se trovass sto sior Conte, ghe vorria piantar dell’altre belle antichità, senza spartir l’utile con Brighella).(da sè)
Pantalone. (Chi diavolo xe costù?) (da sè)
Arlecchino. (Sto barbetta mi nol conoss). (da sè)
Pantalone. Galantomo, chi seu? Chi domandeu?
Arlecchino. Innanz che mi responda, l’am favorissa de dirme chi l’è vussioria.
Pantalone. Son un amigo del sior conte Anselmo.
Arlecchino. Se dilettela de antichità?
Pantalone. Oh assae!2 (Stè a veder che l’è un de quei che lo tira in trappola). (da sè)
Arlecchino. Za che vussioria se diletta de antichità, la sappia che mi son un antiquari. Son vegnù per far la fortuna del sior conte Anselmo3.
