 |
Questa pagina è stata trascritta, formattata e riletta. | |
| 162 |
Dottore. Per ben conoscerli, ci vuole il lume dell’intelletto.
Pantalone. L’intelletto xe un lume che vien oscurà dal fumo de le passion.
Dottore. Signor Pantalone, mi consolo che ancor voi principiate a parlar da filosofo.
Pantalone. Tutti semo filosofi, ma tutti se fabrichemo una filosofia a nostro modo.
Dottore. La vostra filosofia com’è ella fatta?
Pantalone. Facile per mi e facile per chi m’ascolta.
Dottore. Cosa vi suggerisce la filosofia intorno al caso di vostro figlio?
Pantalone. Tre argomenti, uno più bello de l’altro; argomenti da omo, che no xe dottor, da marcante piuttosto che da filosofo. El primo me fa dubitar. El segondo me fa sperar. El terzo me tien tra la speranza e el timor. Sentì el primo. Lelio ha messi i bezzi in quella camera; Lelio ha serrà la porta; Lelio mezz’ora dopo li xe andai a tior, donca Lelio no li ha robai. Sentì el segondo. Se Lelio me li voleva robar, el podeva far de manco de portarmeli a casa; el me li ha portai fedelmente, donca Lelio no li ha robai. Sentì el terzo. Se Lelio no li ha robai, el xe innocente. Se el li ha robai, el se pol pentir, onde o da la innocenza soa, o dal so pentimento, aspetto quella consolazion, sospirada da un pare che ama i so fioi, la so casa e la propria reputazion.
Dottore. Amico, vado a contribuire per quanto posso alla quiete del vostro core, protestandomi d’essere a parte delle vostre afflizioni, e di poter dir con costanza: Amicus est alter ego. (parte)
Pantalone. Col parla latin, ho fenio d’argomentar. La passion produse dei effetti stravaganti in ti omeni. Mi sta volta la m’ha fatto filosofar. Ma che? I mi argomenti xe tanto naturali quanto xe i mi pensieri, perchè la me par cossa da matti pensar in t’una maniera e parlar in t’un’altra. Argomentar colla lengua contra le massime del proprio cuor.
