Pagina:Goldoni - Opere complete, Venezia 1908, II.djvu/625


LA BUONA MOGLIE 615

SCENA XVII.
Bettina e Pasqualino.

Bettina. Vien qua, le mie vissere, vieti qua, el mio cuor. Cossa gh’astu, che ti me par sbatuo?

Pasqualino. Oh, cara mugier...

Bettina. Cara mugier ti me disi? Cara mugier? Benedeta quela boca! Me vustu ben?

Pasqualino. No gh’ho fià de1 parlar. Se savessi cossa xe sucesso?

Bettina. No me far morir, vita mia. Cossa xe stà?

Pasqualino. Lelio xe stà mazzà.

Bettina. Poverazzo! Distu dasseno? Che gieristu ti?

Pasqualino. Giera poco lontan.

Bettina. Hastu abuo paura? Fate trar sangue. Oe, Cate.

SCENA XVIU.
Catte e detti.

Catte. Cossa gh’è?

Bettina. Cara ti, va a chiamar el barbier.

Pasqualino. Lasse star, lasse star. No gh’è bisogno.

Catte. Cossa volevistu far del barbier?

Bettina. Pasqualin ha abuo paura. Porteghe un goto d’acqua.

Catte. Oh giusto aqua. El vol esser vin bon. Dame la chiave de la caneva2.

Pasqualino. No gh’ho bisogno de gnente. La paura me xe passada.

Catte. Voleu de l’aqua per el spasemo? Deme diese soldi, che ve ne vago a tior.

Pasqualino. Ve ringrazio, no vogio gnente. Cara Betina, cossa feu? Sten ben?

Bettina. Sì, caro, co ti xe a casa ti, stago da regina.

Pasqualino. Cossa fa el putelo?

  1. Sav. e Zatta: da.
  2. Cantina.