 |
Questa pagina è stata trascritta, formattata e riletta. | |
| 602 | ATTO TERZO |
Bettina. Mi no vogio altri sforzari. Co no posso, no posso.
Catte. Ti poderessi anca dir; co no vogio, no vogio.
Bettina. Quel che volè. Lasseme star, che me farè servizio.
Catte. Anca co mi ti la gh’ha? Cossa t’hogio fato?
Bettina. Sè causa vu, che m’ho mandà. Se fussi stada con mi una sorela cossediè1, che avessi abuo un puoco più de giudizio e che gh’avessi volesto tegnir conto de mi, fursi fursi no me averia maridà.
Catte. Si ben! Se ti gieri inamorada co fa una gata.
Bettina. Sè stada vu, che m’ha fato inamorar. A forza de supiarme in te le recchie, m’ho incapricià de Pasqualin.
Catte. Mi ah, son stada ah, che t’ho fato inamorar? Povereta! T’arecordistu cossa che ti m’ha dito co ho parla de Pasqualin? Coss’è sto vederemo? Dovevi dirghe de sì. Se lo perdo, povereta vu2. Oe! Mi son stada.
Bettina. Basta; m’intendo mi, co digo torta.
Catte. Donca ti è pentia d’aver tiolto Pasqualin?
Bettina. Mi no, perchè ghe vogio ben, ma se no m’avesse inamorà, no l’averave tiolto.
Catte. Se no ti l’avessi tiolto elo, ti ghe n’averessi tiolto un altro.
Bettina. Co me recordo co giera viva mia mare, povereta, che ani che giera queli! Che spasso che aveva su quel’altana! No vedeva l’ora d’aver fenia la mia tasca, per andarme a solazzar. La festa, che gusto che gh’aveva a ziogar a la semola, a ziogar a le scondariole! Con che gusto che balava quele furlane! Adesso, tiolè, son qua, povereta, abandonada da tuti. El mario no me vol più ben, el missier no me vien più a trovar; me destruzo in lagreme, e no gh’è nissun che me compatissa.
Catte. No ghe songio mi, sorela?
Bettina. E vu no pensè altro che a vu, fia cara. Se cognossemo.
Catte. Oh, ti me cognossi puoco.
