 |
Questa pagina è stata trascritta, formattata e riletta. | |
| LA BUONA MOGLIE | 557 |
Bettina. Cossa voressi far, cara vu?
Catte. Vorave con una fava chiapar do colombi. Voria refarme de Pasqualin e vendicarme de quela lustrissima de favela.
Bettina. Come mai poderavio far?
Catte. Sior Marchese ancora te vol ben; vorave farlo vegnir in casa, e in sta maniera ti te vendicheressi de so mugier e de to mario.
Bettina. Povera senza cervelo, che bisogna che ve lo diga. Un bel rimedio che m’insegnè. Dei vostri soliti consegi che me devi da puta.
Catte. Lo fala siora Marchesa? Ti lo pol far anca ti.
Bettina. Mi no vardo quel che fa i altri, ma so quelo ch’ho da far mi.
Catte. A bon conto to mario te abandona.
Bettina. Se lu me abandona mi, mi no l’abandonerò elo.
Catte. I bezzi xe andai.
Bettina. Pazenzia.
Catte. La roba el la venderà.
Bettina. N’importa.
Catte. El te darà de le bastonae.
Bettina. E mi le torò.
Catte. El sarà sempre un cativo mario.
Bettina. E mi sarò sempre una bona mugier.
Catte. Ti xe una mata.
Bettina. Gh’ho più giudizio de vu.
Catte. Mi no te vegnirò più in ti versi.
Bettina. Farò de manco de vu.
Catte. Sior Pantalon se stuferà.
Bettina. Ghe vorà pazenzia.
Catte. Ti sarà abandonada da tuti.
Bettina. No me mancherà la providenza del Cielo.
Catte. Vago via.
Bettina. Ande a bon viazo.
Catte. Ti vol desgustar una sorela che te vol ben, per un mario che te trata mal?
