 |
Questa pagina è stata trascritta, formattata e riletta. | |
| 528 | ATTO PRIMO |
meter su casa, e quel povero vechio ha speso e spanto, e no l’ha fato gnente. Adesso el me manda lu da magnar, e se nol fusse elo, morirave de la fame.
Catte. Perchè no vastu a star co to missier?
Bettina. El voria elo che gh’andasse, ma mi no vogio.
Catte. Mo perchè?
Bettina. Perchè vogio star co mio mario.
Catte. Ti voi star co to mario, e nol vien gnanca a casa?
Bettina. Ancuo fursi el vegnirà.
Catte. Ti xe ben mata, ve, a patir per causa soa.
Bettina. Oh cara Cate, se ti savessi quanto ben che ghe vogio.
Catte. Ancora ti ghe vol tanto ben?
Bettina. E come! Me contenteria a star su la pagia, purchè fusse con elo.
Catte. Varda come ch’el te corisponde pulito.
Bettina. Son stada una bestia mi a farlo andar in colera.
Catte. Sì ben, ti vedi a portar via i bezzi, e ti ha da taser.
Bettina. Cossa m’importa a mi dei bezzi? Caro el mio Pasqualin, dove xestu, anema mia? Mo vien a casa, vien a consolar la to povera Betina. Vien; tiò i manini, tiò anca el sangue, se ti lo vol.
Catte. Eh via, che ai marii no bisogna volerghe tanto ben.
Bettina. Cara sorela, co s’ha fato l’amor con un solo, no se pol far de manco de no volerghe tuto el so ben.
Catte. Anca mi ghe voi ben a mio mario, ma no fazzo de ste scamofie1.
Bettina. Eh, el mio matrimonio no s’ha da meter col vostro.
Catte. Perchè? Cossa voressi dir?
Bettina. Cara vu, no me fè parlar.
Catte. Me recordo, che anca da puta ti me davi de ste mustazzaea. Son stada una puta da ben, sastu.
Bettina. Uh, quanto che avè fato pianzer la mia povera mare!
Catte. Adessadesso ti me faressi vegnir caldo.
- ↑ Rimproveri.
- ↑ Smorfie, smancierie ecc.: v. Boerio.
