Pagina:Goldoni - Opere complete, Venezia 1908, II.djvu/535


LA BUONA MOGLIE 525

Catte. Vienlo ancuo to mario?

Bettina. Chi sa? Xe do zorni che no lo vedo.

Catte. Ma dove stalo tuto el dì e tuta la note?

Bettina. A ziogar.

Catte. El giera tanto un bon puto! Come mai halo fato a deventar cussì cativo?

Bettina. Le male pratiche.

Catte. Quel malignazo de sior Lelio.

Bettina. Sì ben, giusto elo; che sielo impalao. Ma senti, Cate, to mario me l’ha fato zoso la so bona parte.

Catte. Chi? Mio mano? Ti xe mata, sorela cara. Mio mario tende ai fati soi. Noi xe omo da far zoso nissun.

Bettina. Chi l’ha menà, se ti m’intendi? altri che elo? Oh! ch’el m’ha fato trar tante lagreme quel desgrazià.

Catte. Senti sa, parla ben de mio mario, che se desgusteremo.

Bettina. Ma za, no bisogna tocarghela quela zogia.

Catte. Dormelo el putelo?

Bettina. El me fa deventar mata.

Catte. Cara ti, lassa che lo veda.

Bettina. Tiolemolo suso; za vol ch’el magna la pappa.

Catte. Vien qua, vita mia; vien qua, vissere mie. (leva il bambino dalla culla) Caro costù. Vare co belo ch’el vien. Chi dirave che sto putelo gh’ha un ano? In veritae, vara, ch’el mostra squasi do ani.

Bettina. E co spiritoso ch’el xe. Oe, el me cognosse tanto ben, che del mondo. El disc mama schieto schieto.

Catte. Sì, caro, sì, la la la, mi son la la la, cara la la, cara. (lo accarezza)

Bettina. E la mama, dov’ela la mama?

Catte. Ta, ta. (scherza col bambino)

Bettina. La mama, sì, vissere mie; sì, sangue mio. Vien qua da la to mama. (lo vuol prendere dalle braccia di Cate)

Catte. Lassa star. (a Bettina)

Bettina. Via, dèmelo.

Catte. Siora no, lo vogio mi.