Pagina:Goldoni - Opere complete, Venezia 1908, II.djvu/470

460 ATTO SECONDO

Catte. Fè una cossa. Se volè, andè via. Se tioremo qualcossa per nu. Un bel galana per la novizza.

Bettina. (Maledeta! La gh’ha magna el ducato). (da sè)

Pasqualino. E a mi del ducato no m’ha da tocar gnente?

Catte. Oh che caro mato! Sì, fio, tuto; ti xe paron de casa. Evviva i novizzi; evviva i novizzi.

SCENA XV.

Arlecchino e detti.

Arlecchino. Bravi! Evviva i novizzi, evviva.

Catte. Tasè, stè zitto, che nissun ha da saver gnente.

Arlecchino. Se magna?

Catte. S’ha fato le cosse cusì in scondon, e per adesso no se pol far gnente.

Arlecchino. E vegnì in casa mia a far le cosse in scondon? Me maravegio dei fati vostri. In casa mia a maridarve senza portar da magnar? E ho anca da taser? Adesso vogio andar per tuta Venezia. Vogio trovar vostro pare, vôi trovar sior Pantalon, vôi chiamar tuta la comunità, aciò che se sapia che vu, sior poco de bon, vegnì in casa mia a maridarve, senza portar da magnar. (a Pasqualino)

Bettina. Oh che scavezzacelo! Caro cugnà, abiè giudizio.

Arlecchino. Che giudizio? Co no se magna, no gh’è giudizio che tegna.

Pasqualino. Abiè pazenzia.

Arlecchino. No vogio aver pazenzia. Sti torti no li vôi soportar.

Pasqualino. Sarè el nostro precipizio.

Arlecchino. No me n’importa gnente. Olà, zente. Sappiè che in casa mia... (va verso la porta)

Bettina. Zitto. (ad Arlecchino)

Catte. Zitto. (ad Arlecchino)

Arlecchino. In casa mia ghe xe uno... (va sulla porta)

  1. Nastro.