 |
Questa pagina è stata trascritta, formattata e riletta. | |
| 424 | ATTO PRIMO |
Pantalone. (Ho inteso, no femo gnente). (da sè)
Bettina. Oimei, se sta meggio.
Pantalone. Coss’è, fia mia, el mio descorso v’ha fatto vegnir freddo? Che cade, parleme schietto; respondeme con libertà.
Bettina. Co la vol che ghe parla schietto, ghe parlerò. Mi fin adesso ho lassà che el me vegna per casa, perchè no m’ho mai insunià che cussì vecchio el se avesse da inamorar: da resto, ghe zuro da puta onorata, che no l’averave lassà vegnir. Se el ben che el m’ha fato, el l’ha fato per carità, el cielo ghe ne renderà merito; ma se el l’ha fato con segondo fin, ghe protesto che l’ha speso mal i so bezzi. Se i dusento ducati per maridarme la me li vol dar de bon cuor, da pare e da galantomo, accetterò la so carità: ma se el gh’avesse qualche segonda intenzion, l’avviso che mi vecchi no ghe ne vogio.
Pantalone. Quel che ho fatto, l’ho fatto volentiera e io farò in avegnir. Sì ben, sarò mi vostro pare; ve tegnirò sempre in conto de fia. Me consolo de vèderve cussì bona, cussì sincera. Me vergogno de la mia debolezza, e bisogna che pianza, no so se per causa vostra o per causa mia.
Bettina. Oh via, sior Pantalon, la vaga a Rialto, che xe tardi.
Pantalone. Sì ben, vago via, ma tornerò. Ve contenteu che torna?
Bettina. Come che l’è vegnù fin adesso, el ghe pol vegnir anca per l’avegnir.
Pantalone. Sì ben, caretta. (le fa uno scherzo)
Bettina. Animo, un poco de giudizio. Se vede ben che i vecchi i torna a deventar puteli.
Pantalone. No so cossa dir. Ve veggio ben, ma no ve credè miga che ve voggia ben per malizia. Ve veggio ben de cuor, e vederè quel che farò per vu. Aspetto Lelio, mio fio, da Livorno. I me scrive ch’el xe riuscio più tosto mal che ben, onde subito ch’el vien, fazzo conto de maridarlo e ritirarme in ti mi loghi, sul Teraggio1. Se vorè, sarè parona de tutto.
Bettina. Mi no vogio tante grandezze. Me basta quel che el m’ha promesso.
- ↑ Terraglio o strada del terraglio, ricca di ville, da Mestre a Treviso.
