 |
Questa pagina è stata trascritta, formattata e riletta. | |
| I DUE GEMELLI VENEZIANI | 163 |
senza che mi lo sappia? Quel Brighella servitor, che me andava disendo de mio fradello a Venezia, me dà sospetto che veramente el me creda Zanetto. Tante stravaganze che ancuo me xe nate, le me fa crescer el dubbio. Chi sa? Se pol dar. Oh la sarave bella! Me voggio chiarir. Se ghe xe quel servitor in casa, vôi saver la verità. Scoverzirò terren, senza palesarme. Cancaro! Ghe vol politica. Sta volta bisogna farla da vero cortesan. Oe de casa. (batte dal Dottore)
SCENA XVIII.
Brighella di casa, e detto.
Brighella. Servitor umilissimo; èla ella che batte?
Tonino. Sì ben, son mi.
Brighella. La perdona, perchè adesso in casa no se pol vegnir.
Tonino. No? Perchè?
Brighella. La patrona sbruffa e smania; el patron è sulle furie. Anzi la conseggio andar via; perchè, se i la vede qua, i è capaci de far qualche sproposito.
Tonino. Ma cossa gh’oggio fatto?
Brighella. No so. Sento che i se lamenta, e no so el perchè.
Tonino. Diseme, amigo, ave cognossù mio fradello a Venezia?
Brighella. Certo che l’ho cognossù.
Tonino. Me someggielo?
Brighella. I par un pomo spartio. No se pol dir che no i sia do zemelli.
Tonino. E xe do anni che no l’ave visto?
Brighella. Do anni in circa.
Tonino. Mio fradello...
Brighella. Sior sì, el sior Tonin.
Tonino. E mi mo chi songio?
Brighella. O bella! el sior Zanetto.
Tonino. Che vien da...
Brighella. Da Bergamo, a sposar la siora Rosaura.
