 |
Questa pagina è stata trascritta, formattata e riletta. | |
| L'UOMO DI MONDO | 219 |
Ludro. Oibò. L’amigo che fa el servizio, no xe de quelli che voggia scortegar la pelle ai galantomeni. El se contenta de un onesto vadagno; nol pretende più del sie per cento; mezzo per cento al mese, a uso de piazza.
Momolo. Benissimo; fin qua no gh’è mal.
Ludro. El negozio bisogna che ve contente de farlo per tre anni.
Momolo. E se i so bezzi ghe li dago avanti?
Ludro. Degheli co volè, ma el contratto bisogna farlo per tre anni.
Momolo. Femolo per tre anni. Al sie per cento.
Ludro. Mille ducati al sei per cento importa sessanta ducati all’anno. Tre fia sessanta, cento e ottanta; el prò de tre anni importa cento e ottanta ducati, e questi bisogna dargheli subito, avanti tratto.
Momolo. E se ghe li dago avanti?
Ludro. No ghe li dare; ma se anca ghe li dessi, co xe paga, xe paga. Donca de mille ducati resta ottocento e vinti; batter cento e diese ducati, che m’ave da dar per la sigurtà del forestier...
Momolo. Quelli ve li darò doman, se elo no ve pagherà.
Ludro. Caro sior Momolo, per vu xe l’istesso. Resta settecento e diese ducati; batter da questi la mia sanseria sul corpo dei mille ducati, al do per cento (che manco no me podè dar), resta siecento e nonanta ducati, e questi ve obbligherè a pagarli in tre rate a dusento e trenta ducati all’anno, e no so che grossia.
Momolo. Donca, compare Ludro, questi xe tresento e diese ducati de manco, che me vien in scarsela, e ho da pagar el prò de mille; e de più, pagando un terzo all’anno de capital, ho sempre da pagar el prò dell’intiero. Un bel negozio, che me volè far far! Ma pazenzia! per una volta se pol far un sproposito. Andemo a tor i bezzi, e farò la cambial.
Ludro. (Se lo so, che el gh’ha da cascar). (da sè) Aspettè; bisogna che ve averta d’un altra cossa. Sappiè che l’amigo no gh’ha altro che tresento ducati in bezzi, e el resto el ve lo darà in tanta marcanzia.
- ↑ Rotti del ducato veneziano.
