 |
Questa pagina è stata trascritta, formattata e riletta. | |
| L'UOMO DI MONDO | 205 |
riverenza in ultima, e imparar ben tutte ste cosse a memoria, e farle con spirito e con franchezza; i cria brava, i sbatte le man, e dopo el primo anno, prima figura, dusento doppie, e i sonetti co i colombini.
Smeraldina. Sior Momolo, basta cussì, ho inteso tutto; m’impegno, che vedere se la vostra lezion la farò pulito. In verità dasseno, me par de esser ballarina a st’ora; andarave stassera in teatro.
Momolo. Vedeu? Sto coraggio, sta prontezza, sto ardir xe quello che fa più de tutto. Cossa importa se no se sa gnanca el nome dei passi? Spirito ghe vol e bona grazia, e se se fala, tirar de longo. Intanto, per un principio de bon augurio, tolè sto aneletto, che ve lo dono.
Smeraldina. Oh co bello! grazie, sior Momoletto.
SCENA XIII.
Truffaldino con un uomo, che porta varii vestiti, e detti.
Truffaldino. Lustrissimo sior protettor, giusto de eia cercava.
Momolo. Son qua, monsù Truffaldin.
Truffaldino. Songio monsù?
Momolo. No se salo? Al fradelo de madama Smeraldina se gh’ha da dir monsù Truffaldin.
Truffaldino. Vardè mo qua sto galantomo.
Smeraldina. Chi xelo quell’omo?
Truffaldino. Ho fatto portar dei abiti da vestirme da monsù.
Smeraldina. E chi pagherà?
Truffaldino. El protettor.
Momolo. El gh’ha rason. Chi protegge una vertuosa, xe in obbligo de vestir tutta la fameggia.
Truffaldino. Proveme un abito da monsù. Ma aspettè che me vaga a lavar le man, che sarà un anno che no me le ho lavade. (vuol andare dov’è Lucindo)
Smeraldina. Eh n’importa, caro vu; ve le laverè.
Truffaldino. Eh, che so la creanza. (come sopra)
