 |
Questa pagina è stata trascritta, formattata e riletta. | |
| L'UOMO DI MONDO | 199 |
Brighella. Sè patron de tutto, e se ve occorre de più, comandè; spenderò mi.
Momolo. No, amigo; ve ringrazio. No fazzo debiti. In te le occasion me regolo co la scarsela.
Brighella. Bravo. Cussì fa i galantomeni. E nu altri avemo più gusto de guadagnar poco, e esser pagadi subito, in vece de guadagnar assae, e suspirar i bezzi dei mesi. Vago a avisar i foresti, vago a spender, e a mezo di sarà pronto. (parte)
SCENA VIII.
Momolo, poi Truffaldino.
Momolo. Pur troppo ghe xe tanti de quelli che ordena e no paga mai. In sta maniera i se fa nasara, e i paga la roba el doppio. Mi xe vero che in fin de l’anno spendo assae, ma m’impegno che tanto me val cento ducati a mi, quanto a un altro cento zecchini.
Truffaldino. Lustrissimo.
Momolo. Schiavo, compare Truffab.
Truffaldino. Mia sorella l’aspetta.
Momolo. Vago adess’adessoc a trovarla.
Truffaldino. Ela la verità, che voli che la fazza la ballarina?
Momolo. Certo; la voggio metter all’onor del mondo.
Truffaldino. Anderala colla scuffia?
Momolo. Sior sì, scuffia, cerchi, andrien sciolto, mantelina e cornettad.
Truffaldino. Co l’è cussì, bisognerà, lustrissimo sior protettor, che la pensa al fradelo della ballarina.
Momolo. Certo che no avè d’andar vestio cussì malamente.
Truffaldino. Poderoggio portar la spada?
Momolo. Siguro.
